Me emrin e All-llahut, Mëshiruesit, Mëshirëbërësit!

74:1.        O ti i mbuluar!

74:2.        Ngrihu dhe tërhiqu vërejtjen (duke i thirrur).

74:3.        Dhe madhëroje Zotin tënd!

74:4.        Dhe rrobat tua pastroji!

74:5.        Dhe të keqës së ndyrë largohu!

74:6.        Dhe mos u mburr me atë që jep e të duket shumë!

74:7.        Dhe për hir të Zotit tënd duro!

74:8.        E, kur të fryhet në Sur,

74:9.        Atëherë ajo është ditë e vështirë.

74:10.      Për jobesimtarët është jo e lehtë.

74:11.      Ti, më le Mua dhe atë që e krijova të vetmuar.

74:12.      Dhe bëra këtë pasuri të madhe.

74:13.      E bëra edhe me djem që i ka me vete.

74:14.      Dhe Unë i lash në disponim të gjitha mundësitë.

74:15.      E ai lakmon që t’i shtoj edhe më tepër.

74:16.      E jo, se ai vërtet ishte mohues i fakteve tona!

74:17.      Atë do ta ndrydhi me një dënim të rëndë e të padurueshëm.

74:18.      Pse ai shumë mendonte, radhite e përgatiste (për Kur’anin).

74:19.      Qoftë i shkatërruar, po si përceptonte?

74:20.      Prapë qoftë i shkatërruar, po si përceptonte?

74:21.      Ai sërish thellohej në mendime.

74:22.      Pastaj mrrolej dhe bëhej edhe i vrazhdë.

74:23.      Pastaj ktheu shpinën me mendjemadhësi.

74:24.      E tha: “Ky (Kur’ani) nuk është tjetër, vetëm se magji që përcillet prej të tjerëve.

74:25.      Ky nuk është tjetër, përveç fjalë njerëzish!”

74:26.      E Unë atë do ta hedhë në Sekar!

74:27.      E, ku e di ti se çka është Sekar?

74:28.      Ai nuk lë send të mbetet pa e djegur.

74:29.      Ai është që ua prish dhe ua nxin lëkurat.

74:30.      Mbikëqyrës mbi të janë nëntëmbëdhjetë.

74:31.      E mbiqëkyrës të zjarrit, Ne nuk bëjmë tjetër, përveç engjëjve dhe numrin e tyre (të përmendur në Kur’an) nuk e bëmë për tjetër, por vetëm si sprovë për ata që nuk besuan, e që të binden ata që u është dhënë libri, e atyre që besuan t’u shtohet besimi, e atyre që u është dhëmë libri dhe besimtarët të mos kenë dyshim, dhe ata që zemrat i kanë të sëmura dhe jobesimtarët të thonë: “Ka dashti All-llahu me këtë shembull?” Ja ashtu, All-llahu e lë të humbur atë që do, e ushtrinë e Zotit tënd nuk e di kush pos Atij, e ai (Sekari), nuk është tjetër vetëm se një përkujtim për njerëz.

74:32.      Jo, nuk është ashtu, Pasha hënën!

74:33.      Edhe natën kur tërhiqet!

74:34.      Edhe agimin kur agon!

74:35.      S’ka dyshim se ai (Sekari) është një nga belatë më të mëdha.

74:36.      Është vërejtje për njerëz!

74:37.      Për atë nga mesi juaj që dëshiron të përparojë (në të mira) apo të ngecë.

74:38.      Secili njeri është pengë i veprës së vet.

74:39.      Përveç atyre të djathtëve.

74:40.      Që janë në Xhennete e i bëjnë pyetje njëri-tjetrit,

74:41.      Përkitazi me kriminelët (e u thonë):

74:42.      “Çka u solli juve në Sekar?”

74:43.      Ata thonë: “Nuk kemi qenë prej atyre që faleshin (që bënin namaz);

74:44.      Nuk kemi qenë që ushqyenim të varfërit;

74:45.      Dhe kemi qenë që përziheshim me të tjerët në punë të kota.

74:46.      Dhe kemi qenë që nuk e besonim ditën e gjykimit.

74:47.      Derisa na erdhi e vërteta (vdekja)!”

74:48.      E tanimë, atyre nuk u bën dobi ndërmjetësimi i ndërmjetësuesve,

74:49.      Po çka kishin ata që largohesin prej këshillës (Kur’ait)?

74:50.      Ata ishin si gomarë të trembur (të egër).

74:51.      Që ikin prej luanit (ose prej gjahtarit).

74:52.      Veç kësaj, secili prej tyre dëshironte t’i jepej libër i posaçëm (i hapët, i qartë).

74:53.      E jo! Por ata janë që nuk frikësohen botës tjetër.

74:54.      Dhe jo! Se ai (Kur’ani) është këshillë e lartë.

74:55.      E kush do, këshillohet me të.

74:56.      Po ata nuk mund të marrin mësim prej tij, vetëm nëse All-llahu di, Ai është i denjë për t’iu ruajtur dhe i denjë për falje mëkatesh!